Johanes 20 : 19 – 31 “Saluhut Namarhosa Ingkon Mamuji Debata”

Epistel Minggu Quasimodogeniti, 3 April 2016

Johanes 20 : 19 – 31

“Saluhut Namarhosa Ingkon Mamuji Debata”

Pdt. Polma Hutasoit, S.Th

I.                   Patujolo

Dungkon mate Jesus, parngoluon ni angka sisean i gabe sai songon anak ni manuk na siok-siok na hamagoan indung. Ndang diboto nasida laho tudia jala naeng mangulahon manang aha. Mabiar do tong nasida patudu bohi tu tonga-tonga ni natorop i. Biar rohanasida sotung do ditangkup jala laos dipusa dohot nasida. Ala ni i marpungu ma angka sisean i di sada inganan jala disordak ma nang angka pintu asa unang adong na boi masuk tu bagas i. Di na pungu i nasida, sungkun-sungkun be do di rohana, toho do nuaeng nunga hehe Jesus i.? Ai nunga tangkas diida angka boru-borui nang deba sian sisean i  na so di udean i be bangke ni Jesus i. nang pe nunga di hatahon si Maria naung hehe Jesus i jala naung pajumpang ibana dohot Jesus, alai tung so porsea dope nasida, ala adong do songon tradisi di halak Jahudi, ianggo boru-boru do manghatahon, ndang boi dope diparhatutu nasida hasintongan ni i. Alai di turpuk on, nalnal ma diida simalolong ni nasida, nunga ditaluhon Jesus be hamatean i, jala tangkas ma diparhatutu nasida, ia molo Jesus i, toho ma Ibana Mesias jala Anak ni Debata.

II.                Hatorangan Ni Turpuk

1.        Nunga Talu Hamatean Dibaen Tuhan Jesus I (ay. 19 – 20)

Nunga dibege angka sisean i nian barita naung hehe Jesus sian hamatean jala deba sian nasida nunga mangida naung kosong tanoman i. Nunga dihatahon si Maria nian naung pajumpang ibana dohot Tuhan i laos dihatahon hata na pinasahat ni Jesus i tu tonga-tonga ni nasida. Alai ala so pajumpa dope nasida dohot Tuhan i, manongtong dope nasida di bagasan biar ni roha. Ido umbahen na marpungu nasida di sada inganan ala biar ni nasida tu halak Jahudi. Ai tangkas do diida nasida songon dia posina diae Jesus i sahat tu na tos hosana. Di dok di turpuk on ay. 19, marpungu do nasida di bot ni ari, di ari parjolo dung salpu ari Sabbat. Ari parjolo dung Sabbat ima ari Minggu, dison ma ari parhehe ni Jesus sian na manaluhon hamatean, laos dison ma dipatupa parsaoran na parjolo di saluhut halak siihut Kristus, ima angka siseanNa i. Di na holsoan jala tahutan nasida, ro ma Jesus tu tongatonga nasida, jala dipangkulingi ma nasida, “Dame ma di hamu”. Tarsonggot jala mabiar do nasida mambege tabi i, ai sordak do sude pintu, alai boi masuk jolma jala mandok tabi tu nasida. Alai dung di dok Jesus songoni, didapothon ma angka sisean i, dipatudu ma tanganNa dohot andoraNa naung matombuk i asa diida angka seseanNai jala asa porsea nasida naung hehe Ibana tumaluhon hamatean i. dung diida angka sisean i naung hehe  Jesus i, las situtu rohanasida.

Tontu sahali, haroro ni Jesus on mandapothon nasida gabe sada halongangan do, di na hinsu  jala sordak sude angka pintu, boi Ibana masuk. Marhitehite sian on naeng patorangon ni ssi Johannes, ia molo Jesus dang boi hopinan/ batasan ni manang aha pe. Didia pe, andigan pe, di situasi na songon dia pe boi do Ibana ro. On ma na gabe sada bukti na paposhon rohanta. Nang pe di bagasan biar ni roha, lomos, hagogoton, nang parungkilon na balga pe hita, tongtong do ro Jesus i. Molo porsea do hita disi Jesus i mampargogoihon hita di sude situasi ni ngolunta, papataronNa ma huasoNa i mangurupi hita. Sigaru hamatean ditaluhon, sibolis ditaluhon, lam ma parungkilonta i.? Ai sude do  na manggulmit di  portibi on tunduk tu Ibana, ala Ibana do Tuhan i jala ditoru ni huasoNa do sude na adong di liat portibi on.

2.        Disuru Jesus Angka Sisean I Jala Dilehon TondiNa Mampargogoihon Nasida (ay. 21 – 23)

Dung dipatangkas Ibada diriNa tu angka sisean i, dipasahat Jesus ma hataNa tu nasida, ima taringot tu panghobasion di tonga-tonga ni portibi on. Ianggo panghobasion ni Jesus nunga sae be, jala on ma tingkina dipasahat ma muse estafet pelayanan i tu angka siseanNa, asa nasida ma mamaritahon saluhut na niida ni nasida uju rap dohot Jesus i. Tangkas di dok Jesus, “Songon sinuru ni Ama i Ahu, suruonku hamu”. Lapatanna, disuru Debata Ama do Ibana laho mamboan jolma i tu dalan hangoluan jala asa olo nasida tumadingkon dosana be jala Ibana ma patupahon haluaon dohot hangoluan i marhitehite mudarNa na durus di Golgata, jadi manang ise naeng mangolu jala mandapot haluon i, ingkon ma jolo di jalo Ibana gabe Mesias jala mengolu jolma i di bagasan Ibana. Jala nunga singkop bei dipatupa Jesus. Nunga ditaluhon hamatean. Nueng, sahat ma ulaon i tu angka sisean i, asa ditorushon nasida naung pinatupa ni Jesus.

Ndada holan na marsuru sajo ianggo Jesus i. Diboto Ibana do ndada ulaon na mura on, jala diboto ibana kemampuan ni angka siseanNa i. Alani i, diparbohali Jesus ma nasida marhitehite gogo na sian Ibana i. Diombushon ma tu nasida ganup Tondi Parbadia. Tondi Parbadia ma na gabe jaminan di nasida mangalehon gogo nang panuturion laho pararathon barita haheheon ni Jesus jala patolhashon ia molo Jesus i Tuhan situtu do. Dilehon Jesus Tondi i tu nasida asa diboto nasida nang hita saluhutna pe, ianggo so tondi ni Tuhan i do tapangasahon di na laho mangulahon hata ni Debata, tung marisuang doi jala dang adong na tuk mangulahon i. Alai marhitehite Tondi Na i, tarbahen hita jala margogo do hita mangulahon na niajarhon ni Tuhan i. Dilehon Jesus do tong huaso/ tanggungjawab di nasida laho manghatahon hasesaan ni dosa ni torop jolma manang manghatahon na hot dope nasida mardosa. Sada tanggungjawab na balga do ianggo na jinalo ni nasida on. On ma sada ulaon na mansai maol ulahonon. Lapatanna, andorang so uhumon dongan mardosa manang daong, ingkon pastihonon do tong diriniba ias sian dosa. Jadi dipasahat Jesus ulaon on tu nasida ndada hollan laho manontuhon jolma i mardosa manang daong, alai asa nasida pe jumolo patuduhon jala pataridahon parbue ni parngoluonna songon tanda naung ditobus Jesus i nasida.

3.        Porsea Ma Tu Jesus Nang So Taida Ibana (ay. 24 – 29)

Uju na ro  Jesus mandapothon angka siseanNa i, sada sian nasida ndang rap disi, ima si Tomas. Dung ro ibana mulak tu parsaoran i, dibege ibana ma sian angka donganna naung diida nasida Jesus i. Alai dialusi ibana ma, “Na so tupa porsea ahu, molo so huida di tanganna i bogas ni labang i, laos dijama jarijaringku bogas ni labang i, jala ia so dijama tanganku andorana i.” Nunga tung sude natorop i, na adong di bagas i manndok tu ibana naung diida nasida Jesus, alai tong do ndang olo ibana porsea. Sasingtongna, nunga sai dilumbahon Jesus tu nasida saluhutna, ianggo Ibana ingkon mate do mamorsan dosa ni jolma i, jala na hehe do muse. Alai tung so olo do si Tomas porsea saleleng so diida matana Tuhan i

Dung salpu ualu borngin dung i, dipatupa nasida do muse parsaoran, di si ma nang si Tomas. Disordak nasida ma saluhut pintu na adong di bagas i. di namarpungu i nasida, dipatupa Jesus ma muse halongangan di tonga-tonga nasida. Pintu na sordak i, ndang tuk mangambati haroro ni Tuhan i tu tonga-tonga nasida. Laos di son ma dipatolhas Jesus tu si Tomas di naung hehe Ibana tumaluhon hamatean i. Disuru Jesus ma asa ro jumonok si Tomas tu Ibana jala asa disurdukhon tanganna tu bugang ni Jesus i, asa unang sai ganggu rohana jala asa porsea Ibana di Jesus naung hehe i. Dung diida ibana Jesus i, laos di dok jala dihatindangkon ma, “Tuhanku jala Debatangku”. Dipaingot Jesus ma ibana nang saluhut natorop i, “Ala diida ho Ahu, umbahen na gabe porsea ho. Martua ma angka na porsea, atik pe so diida”.

Marhitehite ayat on, tubu sada sungkun-sungkun, aha do naumbahen si Tomas jala hita jolma on jotjot dang porsea tu Tuhan i.?

1.      Ulaon ni  sibolis

Tujuan utama ni sibolis ima padaohon jolma i sian Tuhan. Asa boi tercapai sangkap ni sibolis i, ajaranna ma jolma asa ragu hita tu hata nang baga-baga ni Tuhan i, molo nunga tubu keraguan/ lomos ni roha, olo ma sukkun-sungkun hita toho dope dihaholongi Tuhan I hita, toho dope di pasupasu hita, nang lan naasing mambaen jolma i gabe holang jala lam mandao sian Tuhan i.

2.      Ndang masuk akkal

Ndang masuk akkal di torop jolma dihaheheon ni Jesus i. Sigaru si Tomas naung siseanna pe ndang porsea na toho hehe Jesus i. Ringkot antusanta, ndada sude boi pamasukon tu akkalta taringot tu pambahenan ni Tuhan, ingkon mulak tu happorseaon do/ kembali ke iman. Molo tapaksahon do pikkiranta on taringot tu pambahenan nang baga-baga ni Tuhan i, boi do hita gabe lomos jala gabe lam mandao sian Tuhan i, ala godang naso masuk di akkal hata ni Tuhan i.

3.      Ndang porsea di ulaon ni Tondi Parbadia

Jolma na Porsea di Tuhan i ndang maol manjalo jala mangantusi haheheon ni Tuhan i sian hamatean, alai di naso porsea, tontu sahali na maol do manjalo on nangpe nunga dipatorang torop jolma. On ma jolma na sai mangasahon pikkiranna dohot logikana. Nasa na marpardomuan tu ulaon ni Tondi Parbadia ndang tarjalo rohana. Laos alani i ma si Tomas ndang porsea di hata ni angka dongannai. Saluhut do nasida porsea tu Jesus, jala luhut do nasida manjalo Tondi Parbadia i sian Jesus umbahen lam hot haporseaon ni nasida. Ianggo si Tomas, ndang diida ibana Jesus  i, jala dang taruli ibana di Tondi Parbadia i.

4.        Holan Di Bagasan Jesus Do Dapot Haluaon (ay. 30 – 31)

Aut sura  digurithon saluhut na pinatupa Jesus uju ro ibana tu portibi on, dang hasiatan be buku nabadia i. Laos on ma na nihatindangkon ni panurat Johannes. Saluhut na ginurithonna i ima garis  besar panghobasion ni Jesus  uju ro Ibana manopot jala manobus hita jolma on. Panurat Johannes on mandok, umbahen na  disurat pe surat on, asa lam tangkas do panandaionta di angka pambahenan ni Tuhan i tu hita jolma, laos tarajumi ma Ibana do Kristus Sipalua di ganup jolma. Ibana do Anak ni Debata, jala Ibana do dalan hangoluan i. Marhite-hite Ibana ma dapot hita haluaon dohot hangoluan na salelengnilelengna. Ndang adong na sahat tu Ama i jala ndang adong na boi bongot tu Harajaon Banua Ginjang ianggo so marhitehite Ibana. Taulahon jala tahangoluhon ma ngolu na sintong di bagasan jala mardonganhon Tuhan Jesus Kristus i.

III.             Sihangoluhonon

Torop do halak manghatindangkon na porsea ibana di Tuhan i, alai uju mangadopi hamaolon ndang dipataridahon parbue ni haporseaonna i. Gabe ditabunihon do identitasna songon halak na porsea ibana, asa unang lam borat sitaonon na. Jala ndang saotik na mamparsoada Jesus i songon si Petrus asal ma malua ibana. Angka sisean i pe martabuni do di sada inganan ala biar ni nasida mangida halak Jahudi, sotung do gabe dibahen tu nasida songon na tu Jesus i. Alai dung dilehon TondiNa i tu nasida, tubu do habaranion di nasida, jala dipargogoi Tondi i ma nasida. Alani i, hita pe ringkotma ta pangido tu Jahowa asa manang aha pe na taadopi, TondiNa i ma dilehon tu hita mampargogoihon hita. TondiNa i ma na mangalehon habarinion manghatindangkon hasintongan jala napamonangkon hita.

Jotjot do tong ndang boi tajalo manang tahaporseai angka  halongangan na pintupa ni Jesus tu tonga-tonga ni donganta ala so taida langsung. Songon si Tomas, ndang porsea ibana naung hehe Jesus i ala ndang dohot ibana mangida Jesus i, jala ndang taruli ibana di Tondi Parbadia naniombushon ni Jesus i tu tonga-tongan ni sisean na asing. Hape andorang so mate pe Jesus i nunga sai di dok, ianggo Anak ni jolma i ingkon mate jala mangolu do muse. Alai porsea ma ibana dung diida ibana Jesus i ro tu tonga-tonga ni nasida. Alani i, ringkot nian antusanta, ia molo mangolu di bagasan Tuhan i ndada saluhut ingkon berengon asa haporseahononhon. Mansai godang do napinatupa ni Debata di luar pamingkirion ni jolma. Ala ni i unang ma lomos rohanta di hata ni Tuhan i. Nunga pola dihatahon Jesus di Buku Nabadia i, na sai ramotanNa jala dongananNa do hita ganup tingki, pargogoanNa hita di saluhut pardalanan ni ngolunta, lehononNa pangurupion di hita uju hagogotan hita, jala lan angka na asing na ni bagabagahon Tuhan i.

Porsea ma hita di si, saluhut hataNa i sai patupaonNa do di angka naporsea jala na marhaporusan tu Ibana. Di bagasan Ibana do saluhut angka si las ni roha nang pasupasu. Ibana do dalan hangoluan, jala marhitehite Ibana do boi sahat jala bongot hita tu Harajaon ni Debata. Saluhut do na marhosa jala namanggulmit di portibi on tunduk di toru ni huasoNa. Antong, sai martua ma  na porsea di Tuhanta Jesus i, ai taruli ma hita di haluaon na sian Tuhan i. Amen.