Psalmen / Mazmur 133, "Marparangehon Hatiuron Ni Kristus"

EPISTEL MINGGU 12 April 2015

Minggu Quasimodogeniti (Songon Posoposo Na Imbaru Tubu)

Psalmen / Mazmur 133

Marparangehon Hatiuron Ni Kristus

I.               Patujolo

Turpuk on ima : Ende Hananakkok Daud. Pujipujian di hasadaon dohot haholongon sama dongan. Psalmen 133 on manggombarhon hasadaon dohot haulion ni na marhahamaranggi dibagasan Debata nang dohot sama dongan humaliang. Hasadaon na manghorhon pasupasu na suksuk. laos songon sada tona tu ganup angka na porsea asa tongtong dibagasan holong ni roha na manongtong. Ia par psalmen on, jotjot do disoarahon las ni rohana laho manjangkon jala manghamauliatehon sude denggan basa ni Debata marhitehite ende nang tangiang. Suang songoni do nang di turpuk on. Marhite ende pujipujian do di soarahon ibana uli dohot denggan ni parhahamaranggion i. Hasadaon parhahamaranggion na ni dok ni si Daud di ende na on ndada holan na samudar manang holan dongan sabutuhana, alai saluhut na do na porsea di Jahowa. Laos on do na laho si pahebahebaonta marhite-hite turpuk on asa boi tong taparangehon di bagasan ngolunta siganup ari.

II.            Hatorangan Ni Turpuk

1.      Denggan jala Sonang Molo Sahundulan Angka na Marhahamaranggi (ay. 1)

Di bagasan ngolu siganup ari, luhut do jolma mangkirim di ngolu na gok dame, di parsaoran na rosu, jala holang sian angka parbolatbolatan. Alai nang pe ganup jolma mangkirim di ngolu na gok dame i, sai gok dope angka hamaolon na rongom laho mangambati hadameon i. Jotjot hinorhon ni hadirion, sinadongan, pangkat, nang lan angka na asing gabe singkap mabarbar na patubuhon hasesega ni parsaoran. Alai diturpuk on, tung tangkas do di endehon parpsalmen songon dia do parsaoran na denggan i na naung di hangoluhon ibana nang dohot bangsona di hatiha i. Di dok, “Ida ma, dengganna i dohot sonangnai, molo tung pungu sahundulan angka na marhahamaranggi!”

Molo tapamanat hata, “sahundulan” (diam bersama/ tinggal bersama), parpsalmen naeng pataridahon parbue ni jolma manang bangso naung mangolu di bagasan Tuhan i. Sahundulan ndada na laho manghatahon na hundul/ diam/ tinggal nasida di sada inganan, alai na marlapatan do i songon sada dituasi manang suasana roha na sada nasida, jala situasi manang suasana i, ima di bagasan Tuhan na sinomba ni nasida. Rosu ni parsaoran i dipatudos ma songon hasadaon ni na marhahamaranggi, lapatanna adong roha na saling memiliki jala saling melengkapi di nasida. Atik pe dang samudar manang dang dongan sabutuhana, ala sada do nasida di bagasan asi ni Tuhan i. Jadi, tung marimbar do nasida sian angka bangso na asing na so tumanda TUHAN. Ima na olo rap hundul alai tahi ni nasida laho patupahon na so denggan. Olo rap hundul jala marsada ni roha alai laho manjehehon dongan na naasing. Olo marsada ni roha hinorhon adong kepentingan pribadi na laho sibuatonna. Idaon songon na holong, alai holong na marpambuat do rohana.

2.      Gombaran Uli ni Hasadaon na di Bagasan Tuhan I (ay. 2 – 3a)

Pola do digombarhon parpsalmen songon dia do dengganna dohot sonang ni parsaoran na rosu i. adung dua tudostudos dibaen. Tudostudos na parjolo didok, ia parsaoran na denggan i songon “miak na hushus di ulu pola mabaor tu mise, tu mise ni si Aron, pola mabaor sahat tu rambu ni angka ulosna”. Aha do hahonaan ni parsaoran na denggan dohot si Aron dohot miak na hushus.? Songon naung taboto, ia si Aron ima haha ni si Musa na huhut mandongani si Musa mamboan bangso Israel ruar sian tano Misir. Ibana ma na gabe sintua ni malim (Imam Besar/ halak Lewi). Marhitehite hata ni Debata tu si Musa, dipature do ulos (jubah) na khusus tu si Aron, jala na mansai uli. Uju diojakhon ibana gabe Sintua ni malim di halak Israel, dimiahi do ibana marhitehite miak na hushus jala na na arga situtu. Miak i dipangke holan laho manabalhon sada sintua ni malim na dirajumi tohonan na badia na sian Tuhan i. uju dimiahi ulu na marhitehite miak na hushus i, pola do mabaor miak i tu muse na ro di tu rambu ni angka ulosna. Lapatanna, songoni ma nang hinadenggan ni hasadaon di bagasan Tuhan i. Nang pe simajujung ni si Aron na dimiahi, alai mabaor miak i tu bagian naasing ni dagingna. Songoni do nang une ni hasadaon i, uju tarpasupasu ngolu ni sahalak, taruli do nang na humaliangsa. Dang manghorus tu dirina be, alai ikkon rap mandai di pasupasu na jinalona. Jala hasadaon i diulosi (dibungkus) dibagasan ulos na arga, nauli jala nabadia. Lapatanna, parsaoran i diulosi marhitehite habadiaon ni Debata jala angka jolma nabadia, na biar mida Jahowa ma na nilinggoman ni ulos/ asi ni roha ni Tuhan i.

Parsaoran na rosu i digombarhon do muse songon “nambur ni Hermon, na mabaor tu angka dolok Sion”. Ia Dolok Hermon on, ima sada dolok natumimbona di Palestina. Timbona 2.814 meter, jala puncu ni dolok on ditutupi salju do ganup ari nang pe di ari logo. Sai marnambur do ia puncu ni dolok Hermon si ganup ari.  Jala ombun ni dolok on ma na mabaor tu angka dolok na humaliangsa, ima angka dolok Sion. Ombun manang nambur on gabe sada tudostudos na mangalehon halambokon (kesejukan) dohot parlinggoman, songon na masa di halak Israel uju di halongonan nasida. Dilehon Debata do ombun ti arian i asa adong saongsaong ni nasida jala na mangalehon halambokon di nasida nang pe mohop situtu halongonan i. Jadi nambur ni Hermon i ma na mangalehon halambokon di angka dolok na asing. Jala nang pe ari logo, alai molo tano na di toru ni Hermon i sai tong do napu hinorhon ni salju na gabe mencair jala turun panapuhon tano i.

3.      Hasadaon I Gabe Pasupasu dohot Hangoluan Salelengnilelengna (ay. 3b)

Marhitehite tudostudos na dua on, tangkas ma taboto tujuan ni parpsalmen manggombarhon parsaoran na uli i. Ia parsaoran i hape ndada na holan tu na rikkot di nasida, alai marhitehite parsaoran i, nasida taruli las ni roha, suang songoni na humaliang nasida. Songon miak na arga i jala songon nambur ni dolok Hermon i, songoni ma ngolu na masa di Israel uju di harajaon ni raja David. Gok las ni roha, olopolop, ulaon na dipasupasu Tuhan. Sude i dapot ni nasida ala parsaoran dipajongjong nasida di bagasan holong na sian Tuhan i. Jala on ma sitiruon na dipatudu raja David hatiha i. Dimulai ibana do patupahon parsaoran na rosu i  di tongatonga ni bagasna asa dipatupa ibana di na ginonggomanna, asa gabe dohot ma nang saluhut bangso i mangihuthon raja ni nasida. Parsaoran na uli i gabe pasupasu dohot dalan hangoluan na salelengnilelengna di angka na manghangoluhonsa. Jala tarida doi uju di harahaon ni raja David, tung tupa do saluhut angka nauli na denggan di ngolu ni nasida asal ma mangolu nasida tudos tu hata ni TUHAN.

III.          Hahonaan

1.         Sude do ra hita menghasiholhon ngolunta on gok dame, las ni roha jala marsada ni roha. Alai di masa si nuaeng on, nunga lam maol dapotta dongon na sininta ni rohanta i. Hirim hita mangolu dibagasan dame, alai masa do parmusuan. Hirim hita di las ni roha, alai maol hita mandok mauliate di angka pasupasu ni Tuhan i, jumotjot hita marungutungut ala so masa di ngolunta songon na di rohanta i. On ma na mangambati dapotta las ni roha i.

2.         Aha do na ni igil ni Debata sian hita marhitehite turpuk on.? Naeng ma nian hita marparangehon pangalaho na denggan tu Debata nang tu donganta jolma. Tapataridahon mai marhite holong. Holong ma na ingkon gabe identitas, jatidiri nang karakter na lohot di ngolunta ganup marsadasada. Tupa ma parsaoran na rosu i molo di bagasan sada ni roha hita jala hasadaon i ingkon ma tubu sian roha na ias jala dang holong na marpambuat. Hasadaon ndada laho patuduhon aha na adong di hita, alai ise na mian dia hita, ima Tuhanta Jesus Kristus. Ido umbahen ingkon di bagasan holong ma hataridaan ni parsaoranta, ala Jesus pe mamboan holong do jala di bagasan Jesus do dapot holong na sintong i. ala ni i taparanghon ma holong na sian Jesus i jumolo sian tongatonga ni keluarganta be asa di na humaliang hita. Boi ma nian parsaoranta i gabe pasupasu di na humaliangta, jala ingkon Tuhan ma na marsangap di si. Dao ma sian hita angka perbolatbolatan, elat ni roha, masisogoan, nang angka parsalisihan, ai dang dihalomohon Debata sisongoi masa di tonga ni ngolunta.  Ala ni i, tapangido ma gogo nang pangajarion sian Tuhan i laho patupahon lomo ni rohaNa di bagasan ngolunta. Luhut ma hita ruas ni Tuhan i tarpasupasu jala gabe pasupasu di dia pe hita maringanan. Amen.

C.Pdt. Polma Hutasoit, S.Th